टोकियोमा संकटकाल घोषणा गरिएपछि ओलम्पिक अनिश्चित

भेरी खबर २६ पुष २०७७, आइतवार

कोरोनाभाइरसको फैलिदै गएपछि जापानको राजधानी टोकियोमा संकटकाल घोषणा गरिएको छ। जसका कारण ६ महिनापछि हुने तय भएको टोकियो ओलम्पिक अनिश्चित बनेको छ।

जापान सरकारले बिहीबार एक महिना लामो संकटकाल घोषणा गरेको थियो। जापानका प्रधानमन्त्री योशिहिडा सुगाले संकटको उच्चतम अवस्थामा पुग्न लागेकाले उच्च सतर्कता अपनाउनका लागि संकटकाल लगाउनु परेको बताएका छन्।

अन्तर्राष्ट्रिय ओलम्पिक काउन्सिल (आइओसी) मा लामो समय बिताएका सदस्य डिक पाउन्डले टोकियोमा संकटकाल घोषणा गरिएसँगै ओलम्पिक अनिश्चित बनेको बताएका छन्। 

कोरोनाका कारण गत वर्षका लागि तय भएको ओलम्पिक स्थगित गर्दै नयाँ मिति घोषणा गरिएको थियो।